Взирай с прилежанием, тленный человече,
Како век твой проходит, а смерть не далече.
Готовися на всяк час, рыдай со слезами,
Да не похитит тя смерть со злыми делами.
Ангел же твой хранитель тебе извествует,
Краткость жизни твоея перстом показует.
Текут времена и лета во мгновении ока,
Солнце скоро шествует к западу с востока.
Содержай меч мщения во своей деснице,
Увещает тя всегда и глаголет сице:
«Убойся сего меча, от селе покайся,
Да не посечет тебе, зело ужасайся».
Приидите людие, в вере просвященнии,
Грядите в святыи храм, кротцы и смиреннии,
Молитву прилежную к Богу возсылайте,
На сие писание умильно взирайте.
Прочитая, всяк усердно много прослезися,
От ревности многия сердцем умилися.
Како смерть вселютая вземлет человеки,
Преселяет от мира на вечныя веки.
Како Богу предстанем, много согрешаем,
Како отвещать будем пред страшным судищем?
Да не послет нас Господь во вечныя муки,
Им же не будет конца во веки веком, аминь.